Qədim Çin fəlsəfəsinə görə Yin və Yang kainatın bir-birinə zidd, amma birini tamamlayan qüvvələrdən ibarət olduğunu bildirən anlayışlardır. Yin mənfi nəsnələri və qaranlığı özündə ehtiva edir, Yang isə bunun əksinə müsbət nəsnələri və işığı ifadə edir. Hər birimiz Taijitu simvolu ilə tanışıq, ən azından Kung Fu Panda animasiya filmində görmüşük. Taijitu simvolundakı S-şəkilli xətt Yin və Yang'ın sabit olmadığını, daim bir-birinə çevrildiyini göstərir. Həmçinin simvola baxarkən orda qara hissənin içində ağ nöqtə, ağ rəngli hissənin içində isə qara nöqtə də görürük. Bu onu bildirir ki, heç nə mütləq deyil. Heç nə mütləq şəkildə, əksi olmadan mövcud ola bilməz. Mütləq qara və ya ağ ya da mütləq qaranlıq və ya işıq yoxdur. Hər bir şeyin daxilində onun öz əksindən bir parça var. Deməli, biz həmişə həyatımızda Yin və Yang'ın balansını saxlamalıyıq. Çünki, yaxşı hesab etdiyimiz şeylər də ifrat dərəcədə olanda ziyan vurur. Nə Yin tərəfə, nə də Yang tərəfə həddindən artıq meyil etmək pis nəticələrə gətirib çıxarır. Həyatımızda onların doğru tarazlığını müəyyən edib, o tarazlığı saxlamalıyıq.
