- Bu gün nədən danışaq?
- Bilmirəm, sən başla danış, nədən istəsən danışa bilərik.
- Bəlkə susaq, gözlərimiz danışsın?
- Bəsdir görək, özün bilirsən ki, iki saniyədən artıq gözlərinə ciddi baxa bilmirəm, gülmək tutur hər dəfə.
- Heç demə.. Bilirsən, bir dəfə oturub düşünmüşdüm ki, görən mən şer yaza bilərəm.
- Aha? De gəlsin, şair.
- Zarafata salma. Bir də, mən demədim axı yazmışam. Sadəcə düşünmüşdüm bu haqda. Sonra qərara gəlmişdim ki, yaza bilmərəm.
- İnanmıram, mütləq ki, nəsə cızma-qara etmisən. Xahiş edirəm, utanma. Söylə.
- Yaxşı. Amma gülsən yarımçıq saxlayacam, indidən deyirəm.
- Gülməyəcəm, danış!
Rəqs edərkən dalğalarla dənizlərin sinəsində
Mən xırda bir qayıq idim, sənsə uzaq sahillərdə
Sevgimiz bir dəli külək, əsib coşan hər tərəfdən
Gah apardı sahilinə, gah azdırdı qayığımı sənin uzaq gözlərində…
- Demişdin gülməyəcəksən.
- Bağışla sevgilim, sevincimdən gülürəm. Sən nə gözəl yazmısan belə.
- Gözəl olsaydı dişlərinlə yox, qulaqlarınla dinləyərdin.
- Mən indi bu sözdən sonra necə gülməyim?!
- Nəysə, gəl başqa şeylərdən danışaq.
- Qətiyyən olmaz. O şeri axıracan deməlisən. Küsərəm ha. Özü də kimə həsr etmisən onu, hə? Uzaq sahillərdə filan.. Mən ki lap yaxın sahillərdəyəm.
- Heç kimə həsr etməmişəm, əzizim. Sadəcə bir neçə sətir yazıdır.
- Yaxşı, bu barədə sonra söhbət edərik. Əvvəlcə şeri axıra çatdır. Həqiqətən xoşuma gəlirdi.
- Elə isə dinlə.
Rəqs edərkən dalğalarla dənizlərin sinəsində...
- Axı burasını danışdın.
- Başdan başlamaq istərdim, icazə verərsiz, şahzadə xanım?
- Yaxşı, yaxşı, bir də sözünü kəsməyəcəm, söz verirəm. Buyur.
Rəqs edərkən dalğalarla dənizlərin sinəsində
Mən xırda bir qayıq idim, sənsə uzaq sahillərdə
Sevgimiz bir dəli külək, əsib coşan hər tərəfdən
Gah apardı sahilinə, gah azdırdı qayığımı sənin uzaq gözlərində
Sevgi nədir, üç il, beş il ömrümü var?
Alovlanıb şaxə qalxıb, yavaş-yavaş sönən ocaq
Ya günləri inci təki düzdüyümüz görünməz bir sap kimidir
Qırılarsa durar zaman, kəsər külək, yaşar insan, gülməz ancaq
Gəl danışaq, gülək ancaq, qoy aparsın külək bizi
Qal yanımda dalğalara təslim olaq, qoy batırsın sirrimizi
Düşünmədən günlər haqda, illər haqda, gəl rəqs edək biz bu anda
Mən açılan bir səhərəm sənin günəş gözlərində, gəl unudaq sevgimizdə özümüzü
