30 fikirlik marafon!
Ümid edirəm ki, axıra kimi getməyə nəfəsiniz çatmaz...
- Birinci mərhələdə səhv insanları məşhur edirik. İkinci mərhələdə onlara səhv olduqları üçün əsəbləşirik və nəyisə izah etməyə çalışırıq. Üçüncü mərhələ olmur. Yenidən başa qayıdırıq. Bəzən, milyon ildə bir düzgün bir insana qapı açırıq və öz işığı və dəyərləriylə bizə rahatlıq, gözəllik və təmizlik gətirir.
- Dünən birdən birə şeir yazmaq istədim. Arada təb gəlir. Qaçıb bloknota yazıram. Bilmirəm bunu niyə edirəm amma edən kimi rahatlıq gəlir. Şeir çoban və alim söhbətinə əsasən qapımı döydü:
Çobanların dünyasında aliməm mən,
Dad onların, ad da mənim,
Qoyun bilir, quzu bilir çoban məni,
İkinci qoç kimi görür qazan məni,
Yiyələrlə, niyələrlə doluyam mən,
Ədalətsiz reallığın imzasıyam, qoluyam mən.
3. Bizim tv verilişlərin əksəriyyəti bərbad və ucuzdur. Anladım. Alternativ nədir? Hər şənbə axşam saat 10-da canlı edəcəyəm. Qonaq dəvət edəcəyəm. Studiyasız, bahalı mebelsiz, sponsorsuz və filtersiz danışacağam bu qonaqla. Əsas istiqamət insan, davranış, ünsiyyət, ədəbiyyat, psixologiyamız olacaq. Bu canlıya baxmaq istəyənlər İG səhifəmə qoşula bilər.
4. Arada dünyanın ədalətsizliyi ilə barışmaq üçün hind filmlərinə baxıram. İnsan orada olan səhnələri görəndə və dialoqları eşidəndə o qədər rahatlıq tapır ki. Deyirsən ki, bəli məhz belə olmalıdır. Yaxşılar qalib gəlməli və pislər bu qədər rəzil şəkildə məğlubiyyəti dadmalıdır. Amma film bitir və yaxşıların mal olduğu və əzildiyi dünyaya qayıdırsan. İllər keçir və codluq hiss edirsən ruhunun materialında.
5. Aprelin 3-ü, bugün KVAN kitabının işıq üzü görməsindən 9 il keçmiş olur. Böyük bir mərasim üçün 10-cu ili gözləyirəm. Amma bugün axşam gəlib Edulance tədris mərkəzindən, birbaşa özümdən imzalı KVAN ala bilərsiniz.
6. Qadınların və kişilərin fərqlidir amma onları kədərləri birləşdirir. İki tərəf də bugün xoşbəxt deyil. Rollar yoxdur. Düşünün ki, səhnədəsiniz və sizə rollar haqqında heç bir təlimat verilməyib. Proto və ya Anto olduğunuzu anlamırsınız. Səhnənin nə zaman bitəcəyi də bəlli deyil. Sadəcə ağız tərpədib, bədəni müxtəlif şəkillərə salırsınız. Auditoriya özü də tamaşadan baş aça bilmir. Sistem yoxdur. Səhər 5 pişik balası olan dişi pişik onları divarın üstün gözləyən atalarına ötürdü. Balalar atalarıyla qoxlaşıb damın üstüylə növbəti evlərinə getdi. Qışı bizim həyətdə analarıyla keçirdilər. İndi isə havalar istidir və onlar böyük və güclüdür. Hər iki pişiyin koordinasiyasına baxıb fikrə gedirəm. Axı bu pişiklər universitet bitirməyib, ali təhsil diplomları yoxdur. Bu səviyyədə ünsiyyət və əməkdaşlıq necə edilir? Sadəcə yemək yeyib istidə uzanıb yuxuya gedəndə onlara baxıram balalarıyla birgə necə də xoşbəxt olmağı bacarırlar.
7. İnsan söz verəndə özünü işə salır. 30 fikirlik marafona sizin nəfəsi bilmirəm amma özümün də nəfəsim çatmaya bilər. Nə vaxtsa hər evin rəfində KVAN olmaya da bilər. Amma mənim bacardığımın ən yaxşısını edəcəyəm. Elə evlər var ki, orada rəflərdə bu qırmızı kitab durur. Hələ açılmayıb, hələ oxunmayıb, hələ rəyi yazılmayıb. Hələ kofesi alınmayıb (kofe al link). Ciyərlərim güclüdür. Görək hara qədər aparıram bu marafonu.
8. Bəzən valideynlərimizlə aramızda elə hadisələr yaşanır ki, onları yaşamasam daha yaxşı olardı deyirsən. Amma yaş keçdikcə bu xaricilərin İdolize-Demonize-Humanize söhbəti yerinə düşür. Valideynlər bizim üçün əvvəl Tanrı, sonra Şeytan, sonra isə İnsan olur. Yəqin ki, onlar üçün də biz belə bir 3 mərhələli bir sınaq və ya həyat dərsi oluruq.
9. Futbol da bir dindir. Hal-hazırda dünya futbolu böyük bir nəzir qutusuna çevrilib. İnananlar həmin qutuya pul atır amma həmin pul nə Allaha nə də dinə aid olmayan yerlərə çatır.
10. Kitablar ona görə olmalıdır ki, bizim də öz iradəmiz qala bilsin. Biz məlumatı hazır qabdan yeyirik. (Texnologiya) amma uzaqlarda elə ağaclar və elə meyvələr var ki, bizi bu cəhənnəmdən cənnətə qaytarar.
11. Yazını yox yazanı öyrənməyi daha çox sevirəm. Mənə görə yazı onun həyatının və illərinin şirəsidir. Nə yox kim yazıb məsələsi mənə daha doğma gəlib. Ona görə də arada metroda Osho oxuyanların üstünə gedib ay bacı, ay qardaş bu adamın yazdıqları özünə aid deyil onu heç olmasa araşdırın demək istəyirəm. Amma sonra anlayıram ki, insan üçün öz seçimi daha əzizdir. O, seçimini edibsə gecdir. Salamatı əvvəldən xəbərdar etməkdir deyəcəkdim amma o da işləmir. Biz necə də qəribə məxluqlarıq.
12. Da Vinçinin 500 il əvvəl çəkdiyi şam yeməyində 13 nəfər ancaq İsanı və tələbələri deyil. Qoroskopda olan 13 ayı və bürcləri təmsil edir. İsa Günəşdir digər 12 bürcü sizə saymağa ehtiyac yoxdur.
13. Pul tələsinə Nyuton belə düşüb. Maraqlıdır ki, Nyuton dünyanın gəlmiş keçmiş ən güclü beyinlərindən biridir amma o da FOMO qurbanı olub. Yəni maliyyə piramidasına qoşulub və pul qazanıb. İkinci raunda girib və bütün pulu itirib. Yəni bu piramidanın gücü insanın ümidlərində və tamahlarında gizlidir. Maraqlıdır ki, Misirdə olan Piramidanın başqa planetdən gələnlər hansı ümid və tamahla inşa ediblər. 😊
14. İdeal Azərbaycanı düşünürəm. Köhnə avtobuş və maşın qalmayıb. Həmin metalları emal edən və onlara yeni həyat verən zavodlar işləyir. Millət rayonlarda və şəhərdə eyni fürsətləri tapa bilir. Amma bu romantikadır.
15. Kitabevlərinə kitab verəndə elə bilirəm ki, kitablarımı Sibirə sürgün edirəm. Sibirin qışı və həyat şərtləri sərtdir. Sibir elə bir yerdir ki, orada ancaq Stalinlər xeyir tapır.
16. İllər ötdükcə tanıdığım insanların sayı çoxalır amma görmək istədiyim insanların sayı azalır. Hətta bəxtim gətirsə hamısını bir çay süfrəsinə yığa biləcək qədər bir ömür yaşamaq istəyirəm.
17. Netlix-də bir film var Life List adında. Maraqlı bir bucketlist versiyasıdır. Ana öz qızına qəribə bir miras qoyur. Qızı uşaqlıqda yazdığı siyahını tam həll etməlidir ki, ona qəşəng bir miras qalsın. Qız da hamısını edib sonuncu bənddə ilişib qalır.
18. Yunan mifologiyasından danışırdım və tələbələrdən birinin gözləri parıldadı. Ona Madlen Miller dedim və amazon sifarişini göstərdi. İkimiz də güldük. Ona Circe-ni ilk dəfə oxuyacağı üçün paxıllığım tutur.
19. Çap etməli olduğum və mənim üzümə baxan kitablar: Onqaku, Alamo13, Danış Görək.
20. Hə, ümid edirəm ki, bu hissədə artıq ancaq öz yazdıqlarımı ancaq özüm oxuyuram. Tək gedirəm. Forrest kimi tək qaçıram. Arxaya dönüb kimisə görmək məni mənəvi cəhətdən yorar. Ağır söhbəti fiziki görüşlərə saxlayım yaxşısı.
21. Mirzə Ələkbər Sabirin kofe al hesabı olsaydı onun da haradasa 89 nəfərlik dəstəkçisi olardı.
22. Ədəbiyyata ehtiyac qalmayıb. İnsan müasir dünyada sağ qala bilmək üçün vəhşi kimi yaşamalıdır. Bu vəhşi cahilliyində səadət tapır və dünyanın zülmünü sorğulamır. Onun üçün ən böyük zülüm kiminsə ona aid olan ət parçasını qoparmasıdır. Dünyanı parçalamağa doymayanlar romanlardan uzaq durmağa çalışır. Çünki onlar da Guy Montag kimi dəyişə bilər.
23. Arada mənə elə gəlir ki, intibah dövründə yaşamış bir adam olmuşam və ya sakit Yapon əyalətlərindən birində pensiyaya çıxmış bir samuray kimi çay işini görmüşəm. Bilmirəm yəqin sizdə də belə hallar olur. Özünüzü təmi başqa bir dövrə və coğrafiyaya aid hiss edirsiniz.
24. Tənbəlin qeyrət prinsipi var. Ya indi ya heç vaxt. Həmin prinsiplə bütün kitablarımı yazmışam. İndi də bu marafonu yazıram. İndi dayansam vəziyyət ağır olacaq. Fransız hörümçək adam kimi salamatı binanın təpəsinə dırmanmaqdır.
25. Bilmirəm yaz fəslinə görədir yoxsa yox amma carpe diem-ləşir günlərim. Sanki daha canlıyam və daha çox edirəm. Anın ata-batasına ot qoymaq heyif deyil. Yoxsa soyuq günlərdə zülmün bitməsini və xalça toxumağı gözləyən İvan Denisoviç kimi gözləməkdən gözlərim və əllərim yorulmuşdu.
26. Tanrının yumor hissi. İnsan onu axtarmayan zaman tapır. İnsan onu axtarmağa çalışan zaman adətən meşənin cəngəlliyində şeytanla üz-üzə gəlir. Axtarmayın amma görəndə və ya eşidən zaman çaşıb qalmayın.
27. Musiqi, elm və incəsənət bu 3 element sərhəd tanımır. Bu dəhlizlərə girənlər bir də qayıtmır.
28. Hər kostyum geyinənə inanmayın. Onun niyyəti sizin ağlınızın ucundan belə keçmir. Kostyuma İngilis dilində “it will cost you” deyərdim.
29. Hə, gəldim ən ağrılı hissəyə sonuncu səhifəyə çatanda adamın darmadağın olduğu hissədir bu. Kaş biraz da olaydı və o birazdan tutunaydım. Amma biz onsuz da yeməklə doymuruq. Yalamaq qırağa qalsın.
30. Bu fikirlərin içində sizə doğma olan və ya fayda verənləri qeyd edin. Səs edin. Eşidim. Sizi eşitmək mənim üçün vacibdir. Amma həyat davam edir və indi növnəti onlayn seansa qoşulmalı olduğum üçün estafeti sizə ötürürəm. Kofe və çat götürün. Oturun və siftə edin. Uğurlar.
