Sehirli lampa, sehirli xalat, sehirli söz, sehirli iksir olduğu kimi sehirli yazıların da sayı az deyil. Yazı yazmaq sadəcə əlləri qələm tutan insanların ağlından keçənləri ifadə etməsi deyil. Yazılar yaşantılara yönəlik, hisslərə toxunan , həyatı sorğulamağa sövq edən ifadələrin mövqeyini tapmağa kömək edən fikirlər toplusudur. Yazar olmaq- yazarkən üzülən, sevinən, təəccüblənən insanların özlərinə oxşayan insanlarla yollarının kəsişməsidir. Yazarlıq imkansızları imkana çevirən, mücərrədi konkret obraza bürüyən, sözləri musiqi notalarının ardıcıllığıyla düzən düşüncələrin cəmidir. Mühəndislər evləri, yazarlarsa sözləri tikərək bir bina inşa edirlər. Mühəndislərin hər büdcəyə uyğun evlər tikdiyi kimi, yazarların da hər qəlbə toxunan xüsusi yazı üslubları vardır. Yazmaq yaratmaq yaşamaq feillərinin bir araya gəlib üçbucaq yaratmasıdır yazar olmaq. Qırılan boyunbağılar kimi, sınan ümidləri ifadə edən yazılar oxucuları yazara bir addım daha yaxınlaşdırır. Közərən arzuların işığında samovar çayının tüstüsüylə ulduzları müşayət etməyə bənzəyir yazar olmaq. Göyə qalxan qılıncların havada bir-biriylə dalaşması kimi hər yazı da bir digərindən daha yaxşı olmaqçün çalışır. Qoyulan qaydalardan, verilən qadağalardan kənara çıxmağı tələb edir yazar olmaq. Kəsən söz qılıncıyla vuran qəlb qılıncını bir arada hərəkətə keçirən yazıların müəllifi olmağı bacarmaq böyük hünərdir. Hər yazarın istədiyi ən önəmli şeylərdən biri: Gözlərin axtarışa çıxdığı hər yerdə yazarların yazılarına rastlamasıdır. Ən böyük qələbə gözlərdəki sevgi qıvılcımlarını və parlaqlığı oyandıranda qazanılır. Yazılar ruha xitab edən, cismə bəyan edən həqiqətlərin diqqətə alınmasıdır. Hər evin çırağı olduğu kimi, yazarın da yazılarına çıraq tutan onu sevərək oxuyan oxuyucularının olmasıdır. Şamın əriyərək tərk etdiyi bədəninin yenidən alovlanması kimi, bəzi oxuyucular bir gün sevmədiyi yazarların yazılarıyla birləşə bilirlər. Oxucu olmaq yazarın dilindən hekayələrin cərəyan istiqamətini izləmək deməkdir. Oxuyucunun gücü altından xətt çəkdiyi cümlələri beyninə həkk edərək üstündən xətt çəkməyi öyrənməsində gizlidir. Oxuyucu yazarların təkcə dəstək verən qüvvəsi deyil, həm də onları təkminləşdirən aparıcı qüvvələrdir. Oxuyucunun dilindən yazarlıq-Hər fəsili bir kitabda yaşayan mövsüm dəyişkənliyini xatırladır insana. Qurulan bütün mənalı cümlələrin, yığılan bütün hikmətli sözlərin ardında yazarın deyilməmiş düşüncələri yatır. Yazıların keşiyində yazarların fikir izləri, oxuyucuların məmnuniyyət hissləri dayanır. Bir sözlə yazarlıq- Dağıdılan iradənin, yeridilən qərarların, qandallanan sərhədlərin ötəsinə keçən bələdçidir.🧠✌️❤️🩹
