Əsgər getməyimə təxminən 2-3 gün qalmışdı. Adət üzrə əsgər gedəcək olan şəxsin dostları onun yanına yığılır və bu son günləri onunla birlikdə keçirir. Mənim də dostlarım yanıma yığılmışdı. Gəzir, söhbətləşir, yeyib-içir, deyib-gülürdük. Dostlarımdan biri olan Cəmil də yanımda idi. Həmin vaxt bizə danışdığı lətifəni indi sizinlə bölüşürəm. Dedi ki,-Bir lətifə var, bu lətifəyə ancaq əsgərlik çəkmiş insanlar gülür.
Ardınca dalətifəni danışmağa başladı:
"Günlərin bir gün oğul əsgərlikdən qayıdır və yorğun olduğunu bildirir. Atası ona irad tutur:
-Əşşi, bəsdir görək. Əsgərlikdir də. Nəyə yorulmusan yalandan?!
Oğul atasına baxır, baxır nə deyir:
-Ata, zəhmət olmasa, mənə bir stəkan çay gətir, danışacam.
Ata gedir və çayı gətirir. Oğlunun yanına çatanda oğlu deyir ki, -Olmadı!.."
Mən elə onda da bu lətifəyə gülmüşdüm, ancaq indi əsgərlikdəyəm və lətifənin daha yaxşı başa düşürəm.
Bir çox insanın zəif yeri səbirsiz olmasıdır. Səbirsizlik problem yaradan bir xüsusiyyətdir. Hər kəsin mütləq şəkildə aradan qaldırması gərəkən bir şeydir. "Olmadı" insana səbr öyrədir. Bardağın yarı boş, yarı dolu məsəli kimi "Olmadı" da ya cəzadır, ya da səbri öyrənmək üçün vəsilə.
Bəs nədir bu danışdığımız "Olmadı"? Komandanın düzgün yerinə yetirilmədiyini bildirən, həmin komandanın yəqin ki, təkrarən veriləcəyi xəbərdarlığını edən, ən əsası və çətini isə komandadan əvvəlki halda qayıtmağı əmr edən komandadır. Loru dildə sizə izah edim. İki nəfərsiniz və qarşınızdakı insan sizi yanına çağırır. Sizin ona çatmağınıza 3-5 addım qalmış "olmadı" deyir və siz gəldiyiniz yerə qayıdırsınız. Sonra yenə çağırır, yenə "olmadı" deyib qaytarır. Belə-belə onlarla dəfə bu prosedur davam edir. Dözən səbrli, dözməyən isə "nevroz" olur. Hərb işinin ən sevdiyim yanı insanı həm də xarakter nə xüsusiyyətcə möhkəmləndirir.
Təsəvvür edə bilirsiz, işıqfor sizə yaşıl yanır, siz yolun yarısına çatmamış sizə qırmızı olur və siz dəfələrlə bu anı yaşayırsınız?!
Son...
Qəhrəmanov Hüseyn
Əlaqə: 0708663812
İnstagram: qahramanov.huseyn
