Gəlmişəm həmənki görüş yerimizə,
Ağaclar eynidi, divarlar eyni,
Dəftər həmən dəftər, yazılar fərqli.
Bura hər dəfə görüşməkçün gələn,
Simalar eynidi, qəlblərdə
Eyni intizar.
Sənin xəyalınla gəldim bura,
İnsanlar daim mümkünsüzü gözləyirlər.
Artıq sən ayrı, mən ayrı dünyaların adamı,
Bilirəm, olduğun yerdə səni daha çox istəyirlər.
Necə də qəribədi, necə də qəliz,
Hər dəfə görüşdüyümüz bu yerdə,
Sən danışardın mən dinləyərdim,
İndi eyni yerdə eşidirəm fərqli səsləri,
Büküb boynumu susuram kefsiz
Mən həmənki görüş yerindəyəm, həmənki saat,
Axşamdan bir qədər keçib.
O gəlmiyəcək deyən hamıya cavabım,
"Yəqin ki, yenə tıxacda qalıb, gecikib"
İndi şəhər boşdu, yollar da boş,
Gəl, baxım qəmi gizlədən gülüşlərə.
Bəlkə tıxac da, yol da bəhanə,
Bəlkə tələsirsən başqa görüşlərə?
