Film 300 milyonluq büdcəsi ilə son illərin ən bahalı layihələrindən biridir. Amma istər ssenari, istər vizuallıq, istərsə də kinematoqrafiya baxımından ciddi keyfiyyət çatışmazlığı hiss olunur. Əslində, ssenari baxımından sən deyən bir gözləntim yox idi. Çünki dağ boyda Napoleon haqqında 10 səhifəlik hekayə qura bilməyən ssenaristin qələmindən ciddi heç nə gözləmək olmaz. Filmin kütləvi döyüş səhnələrinə ümid bəsləyirdim, amma məyus oldum. Düşünürəm ki, əldəki resurslarla yaddaqalan duel xoreoqrafiyaları yaratmaq olardı. Lakin nə döyüş səhnələri, nə də arena ab-havası birinci filmdəki kimi təsirli deyil. Hətta arenanın "ən möhtəşəm" səhnəsi kimi təqdim edilən hissə daha çox absurd komediya janrına uyğundur. Bu arada, Piter Mensanı yenidən arenada görmək qəribə idi. Deyəsən, arena üçün darıxmışam. Öz aramızdır, məncə, bu filmdən 8 bölümlük ortabab bir serial çıxardı.
Filmin ulduzu, şübhəsiz ki, Denzel Vaşinqtondur. O, roluna mükəmməl hazırlaşıb və filmin dağınıq ssenarisini sürüyərək də olsa hədəfinə çatdırmağa çalışır. Təəssüf ki, Pol Meskalın ifası haqqında müsbət bir şey deyə bilmirəm. Amma əlindəki material zay olduğu üçün vəziyyəti başa düşürəm. Ümumiyyətlə, hekayənin tempi çox axsayır, personajların motivasiyaları izləyiciyə tam nüfuz etmir. Filmi emosional baxımdan gücləndirmək üçün fleşbeklərə və Hans Zimmerin musiqisinə bel bağlayıblar. Mən filmə "IMAX"də baxdım, amma sizə məsləhət görmürəm. "Gladiator II" ilk filmin adını ləkələməkdən başqa heç nə vəd etmir. Bu film orijinal şah əsərin kölgəsində boğulur. Əminliklə deyə bilərəm ki, bu filmə baxmasanız, heç nə itirməyəcəksiniz. Amma Ridli Skotun süqutuna şahid olmaq istəyirsinizsə, bu başqa məsələdir. Bəlkə də Kolizeydə köpəkbalığı görmək sizin üçün daha maraqlı ola bilər…
