2017-ci ildə “Formula 1” ölməkdə olan bir idman növü idi. Azarkeş kütləsi getdikcə yaşlanır, gənc nəsil bu idmana yetərincə maraq göstərmir, sosial media strategiyaları isə çox zəif təsir bağışlayırdı. "Formula 1"in gələcəyi qeyri-müəyyən görünürdü. Amma sonra "Netflix" səhnəyə çıxdı və hər şeyi dəyişdi. Cəmi 5 il ərzində "Formula 1"in azarkeş bazası 50 milyon nəfər artdı, "TikTok" və digər sosial media platformalarında trendə çevrildi. Bəs bu inanılmaz dönüş necə baş verdi?
"Netflix" platformasının "Drive to Survive" serialı
"Formula 1" rəhbərliyi pərdəarxasıda baş verən hadisələri nümayiş etdirmək üçün "Netflix" ilə əməkdaşlıq edərək "Drive to Survive" serialını ərsəyə gətirdi. Əsl yarış həvəskarları onsuz da bu idmanı sevirdi. Amma mövzuya fransız qalan şəxslər üçün "Formula 1" sadəcə eyni yerdə dövrə vuraraq fırlanan maşınlardan ibarət idi. Onları cəlb etmək və auditoriyanı artırmaq üçün fərqli bir yanaşma tərzi tətbiq olunmağa başladı.
"Drive to Survive" serialı "Formula 1"in mətbəxində baş verən hadisələri, dramaları, komandalararası aqressiv rəqabəti və sürücülərin şəxsi hekayələrini geniş auditoriyaya çatdırdı. "Netflix"in bu layihəsi sayəsində "F1"in tamaşaçı kütləsi əhəmiyyətli dərəcədə genişləndi və gənc izləyicilər arasında populyarlıq qazandı.
"Netflix" bu idman növünü 56 ölkəyə təqdim etdi və müxtəlif yaş qruplarından izləyici kütləsi topladı. Ənənəvi avtoidman həvəskarlarından fərqli olaraq, yeni azarkeşlər təkcə yarışlara deyil, həm də komandaların daxilindəki dinamikalara, sürücülərin şəxsi həyatına ciddi şəkildə maraq göstərməyə başladılar. Ələlxüsus "Red Bull" – "Mercedes" arasındakı gərgin rəqabət, "Haas" komandasının maliyyə problemləri və "Ferrari"nin qeyri-stabil dövrlərini əhatə edən bir sıra məqamlar azarkeşləri ekran qarşısına cəlb etdi.
Azarkeşlərlə bağlı strategiyalar
Eksklüziv məzmun: Pərdəarxası videolar, sürücülərlə canlı sual-cavab sessiyaları və yarış simulyasiyaları izləyicilərə "F1" dünyasını daha yaxından kəşf etmək imkanı təqdim etdi. Bu, həm də azarkeşlərin komandalara və sürücülərə olan bağlılıqlarını artırdı.
İnteraktiv təcrübələr: "AR" filtrləri, "F1 Fantasy" liqası və azarkeşlərin səs verdikləri anketlər izləyicilərin yarışlara müəyyən mənada təsir etməsinə şərait yaratdı. Bu yanaşma tərzi həm sosial şəbəkələrdə, həm də ki, real həyatdakı rəqabət hissini alovlandırdı.
"Formula 1" hal-hazırda sosial media platformalarında 40 milyondan çox izləyici kütləsinə xitab edir. “F1”in böyüməsi və yenidən dirçəlməsi idman dünyasında marketinqin necə güclü bir alət ola biləcəyini göstərir. Bu, müasir marketinq dünyas üçün əsl ustalıq dərsidir.
