Uzun müddətdir ki, Yakudza Sushi üçün hazırladığım loqodan sonra yeni bir sifariş almamışdım. Bir gün Instagram vasitəsilə Misirdə suşi restoranı açmaq istəyən ərəb bir müştəri mənə mesaj yazdı. O, Yakudza Sushi loqosunu göstərərək həmin üslubda “Konowa” adlanan bir loqo hazırlamağımı istədi. Loqonun taglaynı isə "Sushi & Wok Bar" olmalı idi.
Adətən loqo hazırlayanda xidmətin və məhsulun xüsusiyyətləri ilə yanaşı, adın mənasını da öyrənir və onu detallarla ifadə etməyə çalışıram. Ancaq müştəri adın mənası barədə heç bir məlumat verməmişdi, mən də əlavə soruşmadım. Araşdırma apardım, amma "Konowa" sözünün mənasını tapa bilmədim. Buna görə loqoda hər iki "O" hərfini suşi rolları kimi, "W" hərfini isə iki çubuğun (chopstick) olduğu bir kasa formasında göstərdim.
Loqo ilə yanaşı bir neçə alternativ də hazırladım, amma müştəri bu versiyanı bəyəndi. İş tamamlandıqdan sonra loqonu müştəriyə təqdim etdim. O, işdən çox razı qaldı. Təəssüf ki, ödəniş prosesi ilə bağlı problem yaşandı. Müştərinin göndərdiyi ödəniş mənim hesabıma daxil olmadı. Banka müraciət edəndə isə ödəniş rekvizitlərində problem olduğunu dedilər. Halbuki, əvvəlcədən hər şeyi dəqiqləşdirmişdim və lazım olan bütün məlumatları göndərmişdim.
Bir neçə günlük mübarizədən sonra, şikayətim qəbul edildi və ödəniş hesabıma daxil oldu. Bundan sonra loqonu müştəriyə göndərdim. Amma müştəri ilə əlaqə saxlamaq çətin oldu və sonradan onu tapmaq mümkün olmadı. Mən həmişə işlərimin taleyi ilə maraqlanıram, çünki hazırladığım loqoların fərqli ölkələrdə istifadə edilməsi mənə böyük qürur hissi yaşadır. İşlərim yalnız mənfəət üçün deyil, həm də mənim sahəmdə iz buraxmağım və bizneslərə real fayda gətirməyim üçündür. Müştərinin uğuru mənim uğurumdur.
Sona qədər oxuduğunuz üçün təşəkkür edirəm. Hər birinizə işlərinizdə uğurlar arzulayıram!
