Salam! 🌿

Son bir neçə ildə özümə ən çox verdiyim sual bu olub: `İnsan niyə nə etməli olduğunu bildiyi halda, yenə də nəsə etmir?`

Bu sual məni davranış psixologiyası, qərarvermə, vərdişlər və insan inkişafı mövzularını araşdırmağa gətirdi. Amma bu maraq kitablardan başlamadı, birbaşa həyatın özü ilə kəsişdi.

2019–2023-cü illərdə Azərbaycan Dövlət Neft və Sənaye Universitetində Kompüter mühəndisliyi üzrə təhsil aldım. Karyerama Frontend developer kimi başladım. Daha sonra startup-larda Product manager, dövlət və özəl sektorda isə IT project manager kimi çalışdım.

Fərqli rollarda işlədikcə başa düşdüm ki, məni ən çox həyəcanlandıran texnologiyanın özü deyil, insanların necə düşündüyü, qərar verdiyi və birlikdə necə sistem qurduğu idi. Bu maraq məni sahibkarlığa gətirdi.

Hilay Company-ni qurduq. Burada onlarla təlim, inkişaf proqramı və layihə həyata keçirdik. For Job Life və Work Simulation Academy layihələri ilə gənclərin iş həyatına hazırlanması istiqamətində çalışdıq və proqramlarımızı tamamlayan iştirakçıların işə qəbul nəticəsi 100% oldu.

Daha sonra CodePays startup-ının idea müəllifi və həmtəsisçisi oldum. Layihəmiz KOICA Startup Acceleration Programında ölkənin ən perspektivli 10 startup-ından biri seçildi, GIST beynəlxalq startup proqramında Azərbaycanı təmsil edən 4 layihədən biri oldu və İnnoStart hakatonunda qalib gəldi.

Bu müddət ərzində Taghiyev's Girls və digər inkişaf proqramlarında mentor kimi fəaliyyət göstərərək yüzlərlə gənclə işləmək imkanım oldu.

Bütün bu təcrübələrin ortaq bir nöqtəsi var idi.İnsanların problemi məlumat azlığı deyildi. Əsas problem bildiklərini gündəlik həyatlarına çevirmək idi.

Məhz buna görə Human Operating System (HOS) layihəsini yaratmağa qərar verdim.

HOS insan davranışı, düşüncə sistemləri və qərarvermə mexanizmlərini sadə və praktik formada izah edən inkişaf platformasıdır. Məqsəd motivasiya vermək deyil. Məqsəd insanların özlərini daha yaxşı başa düşməsinə və həyatlarında işləyən sistemlər qurmasına kömək etməkdir.

Əgər sən də həyatına kənardan baxmaq, düşüncə sistemini anlamaq və dəyişiklikləri təsadüfə yox, sistemə çevirmək istəyirsənsə, xoş gəlmisən.🤍