Rudolf Dassler 1898-ci ildə Almaniyada anadan olub və gənc yaşlarında qardaşı Adolf Dassler ilə birlikdə idman ayaqqabıları istehsal etməyə başlayır. Birinci Dünya Müharibəsindən sonra qardaşlar ailə evinin zirzəmisində ayaqqabı tikərək Dassler Qardaşları Ayaqqabı Fabrikini qururlar.
Bu fabrikin istehsal etdiyi ayaqqabılar idmançılar arasında sürətlə məşhurlaşır və hətta Olimpiya Oyunlarında istifadə olunur.
Zaman keçdikcə qardaşlar arasında ciddi fikir ayrılıqları yaranır. 1948-ci ildə yolları ayırılır və bu ayrılıq sadəcə ailə dramı deyil, idman sənayesinin taleyini dəyişən hadisə olur.
Bu ayrılıqdan sonra Rudolf Dassler öz brendini qurmaq qərarına gəlir və PUMA-nın əsasını qoyur.
Rudolf Dassler PUMA-nı sürət, çeviklik və güc anlayışları üzərində qurur və qısa zamanda atletlər arasında tanınmağa başlayır. PUMA-nın dizaynları xüsusilə futbol və yüngül atletika sahəsində fərqlənirdi.
1950–1960-cı illərdə PUMA dünya səviyyəli idmançılarla əməkdaşlıq edərək böyük tanınma qazanır. Brend tədricən beynəlxalq bazara çıxır və idman modasının əsas oyunçularından birinə çevrilir.
