Psixologiya sahəsində fərdi tanımaq,onun haqqında müəyyən məlumatlara sahib olmaq üçün müxtəlif metodlardan istifadə edilir. Rəsm isə bunlar arasında demək olar ki,ən çox istifadə olunanıdır. Psixoloqların bir çoxu çəkilən rəsmi insanın öz daxili dünyasının (duyğu,düşüncələrinin) yansıması,əks olunması kimi qəbul edir. Xüsusilə,spontan olaraq çəkilən rəsmlər bu sahədən olan mütəxəssislər üçün önəmli bir vasitədir. Rəsmlər sayəsində yalnız fərdin daxili aləmi haqqında deyil də,həmçinin onun olduğu sosial mühit barədə də məlumat əldə etmək mümkündür. Psixoloji dəyərləndirmələr aparılan zaman rəsmi çəkən fərdin yanaşması,çəkdiyi rəsm və rəsmi haqqında verdiyi məlumatlar da xüsusi önəm daşıyır. Qeyd etdiklərimdən sonra ortaya belə bir sual çıxa bilər :"Rəsm sadəcə onu çəkən insanın duyğuları, düşüncələri, daxili ziddiyyətləri,narahatlıqları haqqında məlumat almaq üçündür?" Xeyr,rəsm yalnız dəyərləndirmə üçün istifadə edilmir. Bir sıra rəsm texnikaları vasitəsilə aşkar olunan problemlərin korreksiya edilməsi,düzəldilməsi üçün də istifadə edilir.Bunun ardınca beynimizdə digər bir sual da yarana bilər :"Bəs yaxşı bir rəsm analizi edə bilmək üçün nələri bilməliyik?" Ümumiyyətlə proyektiv rəsm testləri haqqında müəyyən məlumatlara sahib olmaq,rəsm dəyərləndirməsi istiqamətində yeniliklərdən xəbərdar olmaq,rəsmdən əldə olunan məlumatlarla həmin insanla bağlı bilinən məlumatları birləşdirmək önəmlidir. Rəsm çəkildikdən sonra isə ona ümumi olaraq baxmaqda da fayda var. Çünki ilk baxışda rəsmin bizdə oyandırdığı hiss,təəssürat,rəsmin sonrakı mərhələlərdə məntiqi analizi qədər bizim üçün önəmlidir.
Post'da yer alan rəsm öz əl işimdir :)
