1666-cı ildə Londonda günlərlə davam edən böyük yanğın nəticəsində 13 minə yaxın fərdi və ictimai bina yanır. Bu hadisədən sonra binaların yanğından sığortalanmasına başlanılır. Beləliklə, İngiltərədə ilk sığorta cəmiyyətləri yaranır. Sonradan bu təcrübə Avropaya, oradan isə çar Rusiyasına keçərək geniş yayılır.
Çar Rusiyasında ilk sığorta cəmiyyəti – «Birinci Rusiya Sığorta Cəmiyyəti» – 1827-ci ildə yaradılır.
Hər sığorta cəmiyyətinin özünəməxsus lövhəsi olub. Bu lövhələr, adətən, misdən və ya bürüncdən hazırlanaraq binanın fasadına vurulurdu. Lövhələrin üzərində binanı sığortalayan cəmiyyətin adı qeyd olunurdu. Bəzən il də olurdu, bu, cəmiyyətin yaranma tarixi idi.
Binaların sığortalanması 1960-cı illərə qədər davam edib.
Bakıda indiyədək 9 sığorta cəmiyyətinə məxsus lövhə tapmışam: «Birinci Rusiya Sığorta Cəmiyyəti» (1827), «Salamandra» (1846), «Moskva» (1858), «Sankt-Peterburq» (1858), «Şimal» (1872), «Rusiya» (1881), «Rus Sığorta Cəmiyyəti» (1867), «Lövbər» (19-cu əsrin ikinci yarısı) və «İkinci Rusiya Sığorta Cəmiyyəti» (1835).
Təəssüf ki, sığortalı binaların çoxu sökülüb. Lövhələr isə yoxa çıxır.
Yeri gəlmişkən, Gəncədə də sığorta lövhəsi olan binalar var.
