Texnologiya dünyasında yeniliklər bir-birini əvəz edir — bu dəfə diqqət mərkəzində “WhatsApp”, “YouTube” və “Instagram” var.
“WhatsApp” artıq öz daxili bulud saxlama sistemi üzərində işləyir. Bu o deməkdir ki, yaxın gələcəkdə çatların ehtiyat nüsxəsini saxlamaq üçün “Google Drive” və ya “iCloud” kimi əlavə platformalara ehtiyac qalmaya bilər. İstifadəçilər üçün daha sadə və rahat təcrübə vəd olunur.
“Google” isə “YouTube” platformasında “Ask YouTube” adlı yeni eksperimental funksiyanı təqdim edib. Bu alət istifadəçilərə sadəcə video izləmək yox, həm də suallar vermək imkanı yaradır. Sistem videoları analiz edərək ətraflı cavablar təqdim edir, hətta uyğun videolar da təklif edir. Funksiya hələlik ABŞ-də, 18+ “YouTube Premium” istifadəçiləri üçün test mərhələsindədir və iyunun 8-dək aktiv olacaq.
“Instagram” da yenilik yarışından geri qalmır. Platforma “Instants” adlı tətbiqi sınaqdan keçirir. Burada paylaşılan fotolar yalnız bir dəfə görünür və 24 saat sonra avtomatik yox olur. Bu yanaşma daha spontan və “ani paylaşım” təcrübəsi yaratmağı hədəfləyir.
Görünür, texnologiya nəhəngləri istifadəçilərə daha sürətli, şəxsi və interaktiv təcrübə təqdim etmək uğrunda rəqabəti daha da gücləndirir.
